ՆՈՐ ՆՈՐՔ ԼՈԻՐԵՐ

ԳԵՂԱՐՔՈՒՆԻՔԻ ՄԱՐԶԻ ՊԱՏՎԻՐԱԿՈՒԹՅԱՆ ԱՅՑԸ ՆՈՐ ՆՈՐՔ ՎԱՐՉԱԿԱՆ ՇՐՋԱՆ

Նոր Նորք վարչական շրջանի և ՀՀ Գեղարքունիքի մարզի միջև ձևավորված համագործակցությունն առավել ամուր հիմքերի վրա դրվեց ՀՀ Գեղարքունիքի մարզի պատվիրակության փոխադարձ այցելությամբ, որը գլխավորում էր Գեղարքունիքի մարզպետ Նվեր Պողոսյանը: Նոր Նորք վարչական շրջանի ղեկավարի աշխատասենյակում կայացավ համագործակից կողմերի համատեղ քննարկում, որի ժամանակ ի մի բերվեցին արդեն մշակված ծրագրերի կյանքի կոչման ուղիները:
Այնուհետև կողմերը եղան Նոր Նորքի Ֆ. Նանսենի անվան բարեկամության պուրակում, մասնակցեցին խորհրդանշական ծառատունկին: Նոր Նորք վարչական շրջանի ղեկավար Մելիք Գասպարյանի ուղեկցությամբ Գեղարքունիքի պատվիրակությունն այցելեց նաև Նոր Նորքի Սուրբ Սարգիս եկեղեցի, որն արդյունավետ օրվա վերջին, տրամաբանական ավարտն էր: Համագործակցությունն ամուր հիմքեր հաստատեց և ապագայում կարտահայտվի համատեղ տարբեր միջոցառումների ու ձեռնարկների տեսքով:

Ստեղծագործական խումբ Creative Group
Արթուր Դանիելյան Arthur Danielyan
Հեղինե Կարապետյան Heghine Karapetyan
Նարինե Ադամյան Narine Adamyan
TVADSTUDIO©

ՆՈՐ ՆՈՐՔՈՒՄ ԳՈՐԾՈՂ ՍԿէՆԱՌ ԱՌՈՂՋՈՒԹՅԱՆ ՎԵՐԱԿԱՆԳՆՈՂԱԿԱՆ ԿԵՆՏՐՈՆ

Գլխուղեղը ամբողջ օրգանիզմի կառավարման հիմքն է, այն յուրօրինակ ազդակներով կարգավորում և ղեկավարում է մեր մարմինը:
Օրգանիզմում առաջացած հիվանդությունների դեմ պայքարելու համար գլխուղեղում արտադրվում են անհրաժեշտ նեյրոհորմոնալ նյութեր, որոնք հաղթահարում են հիվանդությանը: Սակայն դրանց պակասի արդյունքում երբեմն հիվանդությունը խոր արմատներ է ձգում մարդու օրգանիզմ` դառնալով մեր կյանքի անբաժանելի ուղեկիցը:

Բժշկության ոլորտի նորագույն հայտնագործությունների արդյունքում այսօր սկէնառ թերապիայի օգնությամբ հնարավոր է դարձել ազդակներ ուղղել գլխուղեղին համապատասխան նեյրոհորմոնալ նյութեր հիվանդության օջախին մատակարարելու համար: Եվ հրաշալի փաստ. նախկինում անբուժելի թվացող բազում հիվանդություններ ոչ միայն բուժման դրական տեղաշարժ են արձանագրել, այլև իսպառ վերացել են օրգանիզմից:
Նոր Նորք վարչական շրջանում գործող Սկէնառ թերապիայի կենտրոնը բազմաթիվ հիվանդների է վերադարձրել առողջ կենսակերպի: Այս առումով Նոր Նորք վարչական շրջանի ղեկավար, ՀՀԿ Նոր Նորքի տ/կ նախագահ և ՀՀԿ խորհրդի անդամ Մելիք Գասպարյանի նախաձեռնությամբ համագործակցություն ձևավորվեց "Սկէնառ առողջության վերականգնողական կենտրոնի" ղեկավար Ռուբեն Հարությունյանի հետ բժշկական ծառայությունը Նոր Նորքի բնակչության առավել լայն զանգվածներին հասանելի դարձնելու համար:

Այսուհետ Նոր Նորքի բազմաթիվ բնակիչներ կարող են դիմել Սկէնառ թերապիայի կենտրոն և բավականին զեղչված բուժսպասարկում ստանալ:
Սկէնառ թերապիայի օգնությամբ հիվանդությունը օրգանիզմից հեռանում է բնական հակազդիչների օգնությամբ: Հետևաբար, ի տարբերություն քիմիականի, չի տուժում մեկ այլ օրգան համակարգ:
Վերականգնելով ձեր առողջությունը սկենառ թերապիայի մեթոդով` Դուք ակնհայտ փոփոխությունները կնկատեք առաջին մի քանի այցելությունից հետո:

Տեղեկությունների համար զանգահարեք 28-85-42 64-45-39 հեռախոսահամարներով, կամ այցելեք Նոր Նորքի 3-րդ զանգված` Գրիգոր Լուսավորիչ բժշկական կենտրոն, առաջին հարկ` "Սկէնառ" առողջության վերականգնողական կենտրոն:

ԿԱՆԱՆՑ ՏՈՆԻՆ ՆՎԻՐՎԱԾ ՄԻՋՈՑԱՌՈՒՄՆԵՐԸ ՆՈՐ ՆՈՐՔՈՒՄ - 2012

Ամեն ժամանակներում էլ կինը կայուն դեր է ունեցել հասարակության և կյանքի տարբեր բնագավառներում: Իրենց մեջ ներդաշնակորեն միահյուսելով քնքշանքն ու հոգատարությունը, կանացի հմայքն ու գեղեցկությունը, նրանք նաև կամքի տոկունություն են դրսևորել հարկավոր պահին:
Պատահական չէ, որ Մայրության և գեղեցկության տոնը հայերս նշում ենք շուրջ մեկ ամիս: Այս առիթով ուշագրավ էին Նոր Նորք վարչական շրջանում կազմակերպված միջոցառումները, որոնք դեռ շարունակական ընթացքի մեջ են:
Կանանց միջազգային օրվա առթիվ Նոր Նորք վարչական շրջանի ղեկավարը հանդիպում ունեցավ Նախադպրոցական, հանրակրթական և արտադպրոցական ուսումնական հաստատությունների կին ղեկավարների հետ: Շնորհավորական խոսքում ղեկավարը մաղթեց տնօրեններին ստեղծագործական և աշխատանքային նոր հաջողություններ սերնդակրթության թեև դժվարին բայց և պատվաբեր ու պատասխանատու ճանապարհին: Շնորհավորական բացիկներ հանձնվեցին նաև Երևանի քաղաքապետ Տարոն Մարգարյանի կողմից:

Միջոցառումների հաջորդ ակկորդը Նոր Նորքի վարչական շենքի դահլիճում էր: Այս անգամ հանդիպումը Նոր Նորքի հասարակական և այլ կազմակերպությունների, հայրենական և Արցախյան պատերազմի վետերանների և զոհված ազատամարտիկների ընտանիքների կին ներկայացուցիների հետ էր:
Միջոցառումն ուղեկցվեց Նոր Նորք վարչական շրջանի Մշակույթի կենտրոնի սաների պարային և երաժշտական կատարումներով, որոնք օրվա խորհրդին տոնական և պայծառ երանգ հաղորդեցին
Մայրության և գեղեցկության տոնի առթիվ շնորհավորանքի խոսք ուղղեց ներկաներին Նոր Նորք վարչական շրջանի ղեկավար, ՀՀԿ Նոր Նորքի տարածքային կազմակերպության նախագահ, ինչպես նաև ՀՀԿ խորհրդի անդամ Մելքի Գասպարյանը
Նոր Նորք վարչական շրջանում գեղեցության տոնի առթիվ կազմակերպված միջոցառմանը ներկա էր նաև առաջիկա խորհրդարանական ընտրություններին Նոր Նորքում մեծամասնական ընտրակարգով առաջադրված թեկնածու Սամվել Ֆարմանյանը: Վերջինս շնորհավորեց ներկաներին` համոզմունք հայտնելով, որ միասին կանգնելով երկրի կառուցման հենքում` դրական տեղաշարժն ակներև կլինի:
Մայրության և գեղեցկության տոնը Նոր Նորքում նշվեց ոչ միայն մշակութային ծրագրով, այլև տոնական նվերների հանձնմամբ:
Գարնանային այս հրաշալի տոնի առթիվ մեր ստեղծագործական խումբը ևս միանում է բազմահազար շնորհավորանքներին` մաղթելով բոլոր կանանց ու աղջիկներին գարնանային պայծառություն և անսահման ժպիտներ:

"ՎԱՐԴԱՆԱՆՑ ԱՍՊԵՏՆԵՐ" ՀԱՄԱՐ 106 ԴՊՐՈՑ ՀԱՅՈՑ ԲԱՆԱԿ-20

Հայոց բանակի 20-ամյա հոբելյանը համազգային հնչեղություն ստացավ, քանի որ մեր երիտասարդ պետության մեծագույն նվաճումներից է, ազգի պաշտպանության և զորեղացման հուսալի պատվարը:
Այս առումով Նոր Նորք վարչական շրջանի ուսումնական հաստատություններում կազմակերպվեցին և իրականացվեցին տարաբնույթ միջոցառումներ, որոնք դաստիարակչական և ուսուցողական բնույթ ունեին:
Այս անգամ մեր հաղորդաշարն անդրադարձավ Նոր Նորք վարչական շրջանի "Վարդանանց Ասպետներ" համար 106 դպրոցում կազմակերպված միջոցառմանը, որն իր շրջանակներում էր ներառել կրթօջախի մանկավարժական և աշակերտական ողջ համակազմին:

Միջոցառման խորհուրդը հայոց դարավոր գոյության հենքում մեր քաջազուն հայորդիների անվեհեր և ազգանպաստ գործունեությունն էր, որոնց համախմբում և բնորոշում էր ազգի հանդեպ սերն ու նվիրումը: Նրանց դավանանքը քրիստոնեությունն էր ու հայրենիքը: Այս գիտակցումը մշտապես ուղղորդել է հային` հաղթանակի ճանապարհ կերտել պատմության քառուղիներում: "Վարդանանց ասպետներ" կրթօջախի սաները կերպավորել էին մեր հերոսազգի քաջերին, ովքեր Արցախյան ազատամարտում կարողացան փարոս դառնալ և լուսավորել հաղթանակի ուղին: Միջոցառումը ազգային հայրենասիրական ոգով էր համակել ներկաներին, որոնց կազմում էին նաև Նոր Նորք վարչական շրջանի ղեկավար Մելիք Գասպարյանը, կրթության և մշակույթի ոլորտի անվանի գործիչներ և հյուրեր տարբեր բնագավառներից:
-Մարդկային գործերի մեջ հայրենիքի պաշտպանությունը ամենասրբազան առաքելությունն է,- նշվեց միջոցառման ընթացքում,- և ազգի համար իրենց կյանքը ներդրած յուրաքանչյուր հայորդի արժանի է խորին ակնածանքի և խոնարհումի:
Բանակն է ազգի գոյության և կայուն զարգացման խարիսխը: Այսօր անկախության սերունդներին է ժառանգվում ազատ և անկախ երկիր, ուժային զորեղ կառույցներով: Ապագան հուսալի ձեռքերում է, քանի որ նոր սերունդը հայրենաշունչ ոգով պատրաստ է կրելու և պատվախնդրորեն պահելու հայրենիքի և հավատի հայի դավանանքը:

ՆՈՐ ՆՈՐՔ - ԳԵՂԱՐՔՈՒՆԻՔ ԲԱՐԵԿԱՄՈՒԹՅԱՆ ԴԱՇԻՆՔ

Երևանի քաղաքապետ Տարոն Մարգարյանի նախաձեռնությամբ Երևանի վարչական շրջանների և Հայաստանի մարզերի միջև փոխշահավետ համագործակցության ստեղծելու ծրագրի շրջանակներում Նոր Նորք վարչական շրջանի և Գեղարքունիքի մարզի միջև ձգվեց բարեկամության կամուրջ: Այդ համագործակցության վավերացման առթիվ Նոր Նորք վարչական շրջանի ղեկավարի աշխատակազմի համապատասխան բաժնի պետերը ղեկավար Մելիք Գասպարյանի գլխավորությամբ այցելեցին Գեղարքունիքի մարզ: Նոր Նորքի պատվիրակությունը ջերմ ընդունելության արժանացավ մարզպետարանի ողջ աշխատակազմի կողմից: Գեղարքունիքի մարզպետ Նվեր Պողոսյանի աշխատասենյակում համագործակցող կողմերը ներկայացրեցին իրենց տարածաշրջանի առանձնահատկությունները` կլիմայական, տնտեսական, կուլտուր-մշակութային և այլ առումներով: Միմյանց հանդեպ ձևավորված փոխվստահության մթնոլորտում մշակվեցին համատեղ միջոցառումների և ծրագրերի իրականացման ուղիներ:
Այնուհետև մարզպետարանի նիստերի սրահում կլոր սեղան քննարկմամբ ներկայացվեցին առաջադրվող բոլոր այն կետերը, որոնց շուրջ կձևավորվի ակտիվ համագործակցություն Երևանի Նոր Նորք վարչական շրջանի և ՀՀ Գեղարքունիքի մարզի միջև:
Երկուստեք համագործակցությունը զարգացնելու ուղղությամբ կարևորվեց միասնական աշխատանքը առևտրի, կրթության, մշակույթի, սպորտի, տուրիզմի, սոցիալական ապահովության և առողջապահության բնագավառներում:
Քննարկման ավարտին Երևանի Նոր Նորք վարչական շրջանի ղեկավար Մելիք Գասպարյանը և ՀՀ Գեղարքունիքի մարզպետ Նվեր Պողոսյանը ստորագրեցին համագործակցության պայմանագիր` վերոհիշյալ ոլորտներում համատեղ աշխատելու և արդյունավետություն ապահովելու նպատակով:

Հայլուր Նոր Նորք Գեղարքունիք նոր գործակցություն NORNORQTV/TVADSTUDIO Նոր Նորք-Գեղարքունիք

Պաշտոնական հատվածին հաջորդեց հանդիսավոր մասը: Կողմերը բաժակ բարձրացրեցին ապագայի խոստումնալից ծրագրերի իրագործման համար և փոխանակվեցին հուշանվերներով: Նոր Նորքի պատվիրակության համար կազմակերպվեց նաև փոքրիկ էքսկուրս դեպի Գեղարքունիկի երկրագիտական թանգարան: Հյուրերը առավել սերտորեն ծանոթացան Գեղամա երկրի կենցաղին, վարքն ու բարքը խտացնող պատմամշակութային կոթողներին, արհեստի և արվեստի նմուշներին, գրական ու գեղարվեստական ժառանգության հազարամյա արժեքներին:
Արդյունավետ օրվա վերջին կայանը Գավառի Սուրբ Սարգիս եկեղեցին էր, որտեղ համագործակից երկու կողմերը քրիստոնեային հատուկ խոհեմությամբ աղոթք վեր առաքեցին առ Աստված` հաջողելու ապագա միասնական արվելիք աշխատանքները:
Գեղարքունիքի մարզի և Երևանի Նոր Նորք վարչական շրջանի միջև ձևավորված համագործակցության հիմքերը, կողմերի հավաստմամբ, խոստումնալից ապագային են միտված: Առաջիկայում կայանալիք տարաբնույթ միջոցառումները այդ ճանապարհը տանող առաջին քայլերը կդառնան:
Իրականացվող համատեղ ծրագրերը Երևան քաղաքի վարչական շրջանների և Հայաստանի մարզերի միջև ոչ միայն հաղորդակցման և փոխհարստացման խթան կդառնան, այլև բարեկամության ամուր կապեր կստեղծեն հանրապետության ողջ տարածքում:

ՆՈՐ ՆՈՐՔԻ ԹԻՎ 4 ԱՐՀԵՍՏԱԳՈՐԾԱԿԱՆ ՈՒՍՈՒՄՆԱՐԱՆ

Փետրվարի 21-ին` Նոր Նորք վարչական շրջանի թիվ 4 արհեստագործական ուսումնարանում տոնական արարողություն էր: Փայտի, քարի և մետաղի մշակման ոլորտում էլեկտրական սարքավորումների առաջատար գերմանական ընկերության աջակցությամբ կրթօջախում բացվեց Էլեկտրական սարքավորումների կենտրոն: Արարողությանը ներկա էին ՀՀ ԿԳ նախարար Արմեն Աշոտյանը, Նոր Նորք վարչական շրջանի ղեկավար Մելիք Գասպարյանը և Բոշ ընկերության ներկայացուցիչները:

Հյուրերը ծանոթացան կենտրոնի տեխնիկական հնարավորություններին, գերժամանակակից սարքավորումներին, որոնք կօգնեն ապագա ուսանողներին հմտանալ մասնագիտական դաշտում և դառնալ աշխատաշուկայում պահանջված մասնագետներ:

ՁՅԱՆ ՄԱՔՐՄԱՆ ԱՇԽԱՏԱՆՔՆԵՐԸ ՆՈՐ ՆՈՐՔՈՒՄ ՇԱՐՈՒՆԱԿՎՈՒՄ ԵՆ

Ձյան մաքրման աշխատանքները շարունակվում են

Նոր Նորք վարչական շրջանը գտնվելով բարձրադիր գոտում` առավել քան հետևողական կերպով է ձեռնամուխ լինում ձյան մաքրման աշխատանքներին: Արդյունքում անգամ ամենացուրտ և տեղումներով եղանակի վնասները հասցվում են նվազագույնի: Համապատասխան սարքավորումներով և մեքենաներով ավազի և աղի խառնուրդը հավասարաչափ բաշխվում է Նոր Նորքի բանուկ պողոտաներում` ապահովելով անխափան և անվտանգ երթևեկություն: Համապատասխանաբար մաքրվում են նաև մայթերն ու բակային տարածքները:
Գործի է դրվում ոչ միայն մարդկային այլև տեխնիկական ողջ ներուժը: Նոր Նորք վարաչական շրջանի ղեկավար Մելիք Գասպարյանի անմիջական վերահսկողությամբ աշխատանքները անընդմեջ շարունակվում են: Ձեռնարկվում Է հնարավորը, որպեսզի մաքրման աշխատանքները ընթանան պատշաճ կերպով և ձյունը մարդկանց պարգևի միմիայն հաճելի և լավ տրամադրություն:

ԲԱՆԱԿԻ ՕՐՎԱ ՄԻՋՈՑԱՌՈՒՄՆԵՐԸ ՆՈՐ ՆՈՐՔՈՒՄ

''Բանակը ազգային միասնականության օջախն է'': Հայ մեծ սպարապետ Վ. Սարգսյանի այս բնորոշումն իրավամբ ճշմարիտ պատգամ է դարերի համար: Այդ օջախի հզորությունը, հենարանն ու աննահանջ ոգին մարմնավորում են հայ սպայական կադրերը: Պատահական չէ, որ բանակի 20-ամյա հոբելայնի առթիվ ՀՀԿ կողմից կազմակերպվող և իրականացվող տարաբնույթ միջոցառումների կազմում ՀՀԿ Նոր Նորք և Ավան տարածքային կազմակերպությունների նախաձեռնությամբ այցելություն կազմակերպվեց Վազգեն Սարգսյանի անվան ռազմական ինստիտուտ: Այցն ուշագրավ էր ոչ միայն գեղեցիկ մշակութային ծրագրով, այլև անակնկալ նվերով, պրոյեկտոր և էկրան, որը արդյունավետ դասպրոցեսի կազմակերպման կարևոր նախապայմաններից է:
Հայոց բանակի 20-ամյա տարեդարձի առթիվ ուշագրավ էր Նոր Նորք վարչական շրջանի ղեկավար Մելիք Գասպարյանի այցելությունը նաև ենթասպաների դպրոց: Մշակութային գեղեցիկ ծրագրով թիվ 135 հիմնական դպրոցի սաները շնորհավորեցին ապագա ենթասպաներին, իսկ ավարտին հաջորդեց պաշտոնական հանդիսավոր արարողությունը:

ՀՀ զինված ուժերի ստեղծման 20-ամյակի առթիվ Նոր Նորք վարչական շրջանի ղեկավար Մելիք Գասպարյանը պարգևատրվեց պատվոգրով` ենթասպաների դպրոցի նկատմամբ ցուցաբերած հոգատարության համար: Հասարակական ակտիվ գործունեությամբ դպրոցի աշխատանքներին օժանդակելու համար շնորհակալագրերով պարգևատրվեցին նաև Նոր Նորք վարչական շրջանի ղեկավարի տեղակալ Արմեն Թովմասյանը և իրավաբանական բաժնից Գագիկ Խաչատրյանը: ՀՀ ՊՆ պատվոգրով պարգևատրվեց Նոր Նորք վարչական շրջանի Մշակույթի կենտրոնի տնօրեն Ալվինա Հարությունյանը` հայ մշակույթի հանդեպ ցուցաբերած նվիրումի և հայրենասիրական դաստիարակություն իրականացնելու համար:
Նոր Նորք վարչական շրջանի ղեկավար Մելիք Գասպարյանը ևս իր հերթին գնահատեց ու երախտիքի խոսքեր ուղղեց ենթասպաների դպրոցի պետ գնդապետ Վահան Արսենյանին` արժանացնելով հատուկ շնորհակալագրի` ուղղված ռազմահայրենասիրական դաստիարակության պատշաճ կազմակերպմանը և ապագա ենթասպաներին ազգային արժեքներին հաղորդակից դարձնելուն:
Հայոց հոգու փորձության արդյունքում ծնված մեր ազգային բանակը Այսօր արդեն 20 տարեկան է` բովանդակալից լուրջ տարեգրություն, որն իր մեջ հազարավոր տարիների հպարտանալու արժանի պատմություն ունի ամբարած: Շնորհավոր տոնդ հայոց բանակ թող 20 տարիներդ դարեր ձգվեն և հարստանան հպարտանալու արժանի նորանոր էջերով:

Ստեղծագործական խումբ Creative Group
Արթուր Դանիելյան Arthur Danielyan
Հեղինե Կարապետյան Heghine Karapetyan
Նարինե Ադամյան Narine Adamyan
TVADSTUDIO©

ՍՈՒՐԲ ՍԱՐԳԻՍ ԶՈՐԱՎԱՐԻ ՏՈՆԸ ՆՈՐ ՆՈՐՔՈՒՄ

Սիրո բարեխոս Սուրբ Սարգիս զորավարի տոնը մեզանոմ նվիրական ավանդույթ է դարձել` ձեռք բերելով համազգային հնչեղություն: Տոնի առթիվ ուշագրավ էր Նոր Նորք վարչական շրջանում կազմակերպված միջոցառումը, որը սկիզբ առավ վարչական շենքի բակում կազմակերպված մշակութային գեղեցիկ ծրագրով: Ներկաներին տոնի խորհուրդը մեկնաբանեց Նոր Նորքի հոգևոր հովիվ տեր Նորայրը` այնուհետև` վարչական շրջանի ղեկավար Մելիք Գասպարյանը անդրադառնալով մեր ազգային ավանդույթներին` կարևորեց նմանօրինակ ձեռնարկների դերը նոր սերնդին հայ հոգևոր արժեքներին հաղորդակից դարձնելու առումով: Միջոցառմանը մասնակցում էին Նոր Նորք վարչական շրջանի մշակույթի կենտրոնի սաները, ինչպես նաև գեղարվեստական խմբեր այլ կրթական հաստատություններից:

"Հայլուր" "ԴՊՐՈՒԹՅՈՒՆ"

Սուրբ Սարգսի տոնակատարությունը Նոր Նորքում շարունակվեց ուխտագնացությամբ դեպի 5-րդ զանգվածի Սուրբ Սարգիս եկեղեցի: Տոնական օրվան բնորոշ բեմական հանդերձով և համապատասխան կերպարների ուղեկցությամբ հանդիսավոր կերպով ուխտագնացները հասան ուխտավայր: Սուրբ Սարգիս եկեղեցու բակում տեղի ունեցավ երիտասարդների օրհնության արարողությունը: Քրիստոնեական զորությամբ համակված նոր սերունդը ավագների ուղեկցությամբ տոնին պատրաստվել էր ոչ միայն հոգեպես, այլև հետաքրքիր, ուշագրավ ցուցապաստառներով, որոնք ազնիվ և աստվածահաճո ապրելու պատգամներ էին բովանդակում:
Տոնական օրվա ավարտին եկեղեցում տեղի ունեցավ նաև խոհրդանշական աղաբլիթներ հանձնելու արարողությունը: Երիտասարդ պատանիներն ու աղջիկները հույսով ու հավատով լցված աղոթք վեր առաքեցին առ աստված` ի կատար ածելու իրենց նվիրական երազանքներն ու ցանկությունները:
Նոր Նորք վարչական շրջանը բազմիցս է ներկայանում տարաբնույթ միջոցառումներով, որոնք նոր սերնդին զինում են ազգային-հոգևոր արժեքներով, կրթում հայեցի ոգով` կերտելով ազգին և հայրենիքին արժանի զավակներ:

ՆՈՐ ՆՈՐՔԻ Ֆ. ՆԱՆՍԵՆԻ ԱՆՎԱՆ 150 ԴՊՐՈՑ '' ՀԱՅՈՑ ԲԱՆԱԿ-20 ''

Հայոց բանակը մեր ազգային հարստությունն է` անկախության պատվարն ու հաղթանակի դրոշը: Հայաստանի զինված ուժերի 20-ամյա հոբելյանին նվիրված միջոցառումների շարքը Հայաստանում և Արցախում վերստին հաստատումն էր այն գաղափարի, որ հայոց միասնական ոգու և հավաքական ուժի ծնունդը մեր ազգային բանակն է: Տոնի առթիվ կազմակերպված միջոցառումների կազմում ուշագրավ էր Ֆրիտյոֆ Նանսենի անվան 150 հիմնական դպրոցում կազմակերպված հուշ-ցերեկույթը: Դպրոցը տոնին երկար էր պատրաստվել, այդ մասին խոսում էին միջանցիկ սրահներում փակցված դիդակտիկ նյութերն ու դահլիճում փակցված պաստառները: Միջոցառմանը ներկա էին Արցախյան հերոսամարտի քաջ հայորդիներ, կրթության և գիտության ոլորտի տարբեր ներկայացուցիչներ, Նոր Նորք վարչական շրջանի ղեկավար Մելիք Գասպարյանը և հյուրեր տարբեր ոլորտներից: Դահլիճը հերոսական հոգով էր համակված: Փողային նվագախմբի խրոխտ հնչյունները հայոց հաղթական ոգու զորությունն էին փոխանցում ներկաներին: Միջոցառումն ազդարարավեց Թովմա քահանայի օրհնությամբ, ուղղված հատկապես հայ ռազմիկներին, ովքեր պահում են մեր երկրի սահմանները: Չմոռացվեցին նաև հայոց անկախության համար իրենց կյանքը ներդրած և հայրենքի պաշտպանության ակունքներում կանգնած նվիրյյալները:

Անկախ ՀՀ օրհներգը , որպես անկախության խորհրդանիշ ներկաներին կրկին անգամ հորդորեց, որ ազատ անկախ հայրենիքի ժառանգորդներն են և պետք է պատվախնդրորեն պահեն մեր ազգային արժեքները: Ֆրիտյոֆ Նանսենի անվան 150 հիմնական դպրոցի աշակերտները հայոց հաղթական ոգու զորությունը հիշատակեցին դեռևս հայկյան շրջանից: Իմացիալ մահ հանուն ազգային տեսակի պահպանման: Այո հայը դարեր է անցել շնորհիվ իր արիական ոգու, ընկել է սակայն երբեք չի ծնել և օրհասական պահերին անասելի հզորությամբ համակված համախմբվել է` գիտակցելով, որ ուժն է ծնում իրավունք:
Ֆրիտյոֆ Նանսենի անվան 150 հիմնական դպրոցում կայացած միջոցառումն ասես հայրենասիրական ինքնատիպ մի դաս էր, որն արժանացավ ներկաների հոտնկայս և բուռն ծափողջուններին:
Նոր սերնդին ռազմահայրենասիրական արժեքներով դաստիարակելու և ազգային ոգով կրթելու առաքելությունը պատշաճ իրագործելու համար կրթօջախի տնօրեն Մանիկ Հայրապետյանը և ռազմագիտության ուսուցչուհի Մելանյա Մաիլյանը արժանացան Նոր Նորք վարչական շրջանի ղեկավարի շնորհակալագրին:
Ֆրիտյոֆ Նանսենի անվան 150 հիմնական դպրոցը բազմիցս է հանրությանը ներկայացել օրինակելի միջոցառումներով, որոնք որպես լուսավոր էջեր համալրում և հարստացնում են դպրոցի բովանդակ տարեգրությունը:

Ստեղծագործական խումբ Creative Group
Արթուր Դանիելյան Arthur Danielyan
Հեղինե Կարապետյան Heghine Karapetyan
Նարինե Ադամյան Narine Adamyan
TVADSTUDIO©

ԷՋԵՐ